87 رد (ردود) على هذا الموضوع

[فورته]

السلام عليكــم ورحمـة الله وبركاتــه ،،

اخواتى الأحباء سنبدأ ان شاء الله تطبيق كيف تعملى بلوفر لطفل صغير او بيبى مولود

وكمان الأطفال مابين 6 سنوات و16 سنة .. وستقوم بالشرح معكم الأخت الفاضلة ام عمرو جزاها الله خيرا


بالصور ...

وأحب اضيف لكم بعض المصطلحات الخاصة بفن التريكو لكى تساعدكم بعد ذلك فى قراءة أى باترون بالأنجليزى ..

وهو منقول من أخت فاضلة ندعو لها بالنصر لبلدها الغالى علينا كلنا ...




المصطلحات هي :


knitting=التريكو


knit=k= غرزة عدل


purl=p=غرزة مقلوبة

Row = سطر


cast on= co = بداية الغرز على الابرة


beginning= beg= ابدئى


stitch=st= غرزة


chain=ch= اول غرزة


stockinette stitch= stitch= غرزة الجرسية ( سطر عدل - سطر مقلوب )


Ribbon = Ribbed = Rib= غرزة البليسية او التضليع


loop = lp= عروة


increase= inc= زيادة غرزة


slip = sl = تنقيص


slip stitch = sl st= تنقيص غرزة


ssk = slip, slip, knit شغل غرزتين عدل معاً ( تنقيص )


ssp = slip, slip, purl شغل غرزتين مقلوب معاً ( تنقيص)


yo= yarn over لفة خيط


decrease= Dec= غرزتين عدل معاً


together= tog= معاً


Repeat= rep = كررى


remaining= rem= داومى - استمرى


pattern= pat = باترون


main color= mic = اللون الأساسى


contrasting color= cc = تناغم أو تناسق الألوان


Knot = عقدة


Tighten = زمى أو شدى


neat= نظيف أو مرتب


Armhole shaping = حردة الابط


sleeves = الأكمام


sleeve cap shaping = حردة الكم


shape shoulders = حردة الكتف


shape back neck = حردة الرقبة الخلفية


through = من الأول الى الاخر

side= جانب


turn = ارجعى


pick = القطى









والان سأتركم مع الأخت ام عمرو... والأخت جدة مازن

[ام عمرو]

السلام عليكــم ورحمـة الله وبركاتــه ،،

هنا حبيباتى أضع لكن طريقة عمل بلوفر لشاب وكل أخت تزيد حسب الحاجة





ملحوظة هامة : أهم شىء عند الشراء هو سؤال البائع عن نوع الخيط والحجم المطلوب شغله ونصيحته فى عدد الشلات ونصيحتىقومى بعمل عدد 10 غرز من نوع الخيط قبل العمل ثم قومى بقياسها على بلوفر مضبوط وزيدى من الغرز حتى تحصلى على العدد الملائم وهذه نصيحة البائع لى


أولا نحتاج ل5 شلات 500 جرام وهنا استخدمت خيط 50% صوف و50% إكليرك

وإبر رقم 4ونص لعمل الكوت وإبر رقم 6 لعمل البلوفر فالخيط سميك نوعا ما




نبدأ بعمل الظهر أولا

بســم الله الـرحمــن الرحيــم

نحتاج لعدد من الغرز يقبل القسمة على 10 ويضاف إليها 4 غرز

الظهر :

الكوت يعمل بطريقة البليسيه

غرزة عدل وغرزة مقلوب لنهاية السطر وبالقدر الذى يحتاجه الكوت حوالى 12 سم بإبر رقم 4 ونص ثم نبدأ الغرزة المستخدمة

للخلف

بســم الله الـرحمــن الرحيــم

هنا نبدأ العمل بإبر نمرة 6

غرزة عدل ثم نضع الخيط أمام الشغل ونلتقط غرزة كأنها مقلوبة لكن لا نشتغلها ثم غرزة عدل وهكذا لآخر السطر بمعنى أننا

نشتغل الغرزة العدل عادى وأما المقلوبة فنلاقطها بدون شغل ثم نعيد الفتلة لوضعها ونشتغل غرزة عدل

السطر الثانى كله مقلوب
السطر الثالث كما السطر الأول هكذا حتى نهاية العمل

هنا نصل لحردة الكتف وهذا البلوفر بدون حردة أكمام

نقسم الشغل 3 أقسام نقوم بقفل القسم الأول ونترك القسم الثانى فنشتغله عادى ثم نصل للقسم الثالث فيقفل ويظل

القسم الأوسط على الإبرة فينقل لإبرة خارجية بدون شغل حتى ننهى البلوفر كله




نبدأ فى عمل الصدر

نقوم بشغل الكوت مثل الظهر تماما على إبر رقم 4 ونص ثم نبدأ الغرزة بإ[ر نمرة 6

غرزة الضفيرة البسيطة :

بســم الله الـرحمــن الرحيــم

قمت بعمل غرزة عدل ثم 3 مقلوب لتحديد العمل فقط وأبين مرة أخرى // غرزة عدل و3 مقلوب ثم 6 عدل ثم 3 مقلوب وغرزة

عدل //يكرر ما بين العلامتين حتى نهاية السطر وينتهى السطر 4 مقلوب

السطر الثانى :

// غرزة مقلوب 3عدل ثم 6 مقلوب 3م 3 عدل ثم 1 مقلوب // ينتهى السطر 4 عدل

السطر الثالث = يكرر السطر الأول

السطر الرابع = يكرر السطر الثانى

السطر الخامس يكرر السطر الأول


السطر السادس = يكرر السطر الثانى

السطر السابع = // غرزة عدل 3 مقلوب و إسلتى 3 غرز على ابرة إضافية واجعليها خلف الشغل واشتغلى 3 غرز عدل من

الإبرة اليسرى واعيدى الغرز الخارجية مرة اخرى على الابرة واشتغليها عدل ثم 3 غرز مقلوب وغرزة عدل // يكرر ما بين

العلامتين وينتهى السطر ب4 غرز مقلوب

السطر الثامن = يكرر السطر الثانى

تكرر هذه الأسطر الثمانية حتى نصل لحردة الرقبة قبل أن نصل لنهاية العمل بحوالى 4 أصابع ثم نقسم العمل على 3

نشتغل ثم نقوم بسد 10 غرز فى الوسط ونكمل السطر ثم نعمل فى جانب واحد من العمل ونريد أن نقفل 5 غرز ونشتغل

السطر ذهاب وعودة ثم 3 ثم 2 ثم 1 ثم 1 ثم نشتغل بدون قفل حتى نصل للكتف فيقفل مرة واحدة ثم نقوم بعمل القسم

الآخر مثل سابقه

هنا أنهينا الأمام والخلف فنقوم بخياطتهم معا ثم نبدأ بعمل الكم ونشتغل 40 غرزة بإبرة الكوت السابقة ونعمل الكوت للكم مثل



أنكوت البلوفر قبل أن ننقل العمل للإبر الأكبر قمت بزيادة 10 غرز قسمتها على السطر الموجود أمامى ثم بدأت الكم

قمت بشغله مثل غرزة الظهر ولكننى قمت بعمل ضفيرة فى الوسط فقط ويجب زيادة الغرز كل 4 أسطر تقريبا حتى نحصل

على 83غرز فى نهاية الكم

طبعا هنا الكم لا يعمل له حردة وإنما يقفل مرة واحدة فى نهايته


وهو يكون أقصر من الكم العادى نظرا لأنه كم ساقط ونقوم بقياس طول الكم وذلك بوضعه قبل أن ننهيه أمام الشغل يعنى

الظهر والصدر بدون خياطة ولكنه يكون كأنه ملتصق به ونقيس بالمتر من أول المكان الذى سنشتغل به كوت الرقبة وحتى كوت

الكم من بدايته ثم نقيس وعدى كان حوالى 38 سم








صورة للظهر


فاصل ونواصل

[ام عمرو]

السلام عليكــم ورحمـة الله وبركاتــه ،،

عدنا

بســم الله الـرحمــن الرحيــم

بعد ان أنهيت خياطة الكم بالبلوفر وانتهى العمل نأتى بالإبر الخاصة بعمل كنار الرقبة شغل دائرى متواصل وهى تعطر نتيجة

أفضل

أولا نقوم بنقل الغرز المتبقاة من الظهر ونضعها على إبرة الرقبة الدائرية ثم نقوم بالتقاط غرز من جسم البلوفر داير مدار البلوفر

ثم نشتغل مل الكوت غرزة وعدل وغرزة مقلوب ( بليسيه ) حتى نصل للعرض المطلوب لكنار الرقبة فنقوم بقفل الشغل

ملحووووطة هامة :

يجب مراعاة عند قيامك بالعمل وقبل أى شىء أن تختارى أى وجه سيكون عليه العمل فغرزة الظهر تصلح على الوجهين

وأنا قمت باختيار الوجه المزركش ليكون هو الظاهر لنا

أرجو أن أكون قد قمت بالشرح الوافى وإلا فأنا حاضرة إن شاء الله لتلقى أى تساؤل منك حبيبتى

هنا نرى فى الصورة إبرة الرقبة الدائرية ومنرى مشبك الشغل الذى أستخدمه فى عمل الضفيرة أو نقل غرز عليه حتى الحاجة

إليه وهو يقفل كذلك نرى إبر الشغل




حبيباتى لى عودة إن شاء الله لتوضيح كيفية عمل الضفيرة والرقبة وأى سؤال أنا فى الإنتظار إن شاء الله

[ام عمرو]

السلام عليكــم ورحمـة الله وبركاتــه ،،

ما شاء الله غاليتى فورتة فهذه المصطلحات تسهل كثيرا عند تنفيذ أى عمل من الكتب الإنجليزية

تسلمى

[فورته]

تسلم ايدك ام عمرو .. فى انتظارك لشرح الضفيرة والرقبة..

[ام عمرو]

السلام عليكــم ورحمـة الله وبركاتــه ،،

أبشرى فورتتنا الغالية ......قريبا جدا إن شاء الله


أين جدة مازن ..يا جدة مااااااااااااااااااااااااااااااااااااااااااااااااا
زن هلمى إلينا سريييييييييييييييييييييييييعا

[جدة مازن]

انا اهوه مجهود رائع فورته وام عمرو ربنا يبارك فيكم يارب انا حقدم طقم البيبى وهو عبارة عن بلوفر بكاب وبنطلون وشراب

ودى صورته

[جدة مازن]

انا اشتغلته بصوف تركى رفيع نوعا وملون منه فيه واشتغلته على ابر 4 بيلسيه و4 ونص باقى البلوفر انا اشتغلته بالغرزة المرنة يعنى سطر مقلوب وسطر عدل ولانه ملون فى استسهلت ومعملتش غرزه فيه

الظهر عملته 40 غرزة واشتغلت البليسه حوالى 15 سطر 2 عدل و2 مقلوب على ابر نمره 4 وبعدين اشتغلت باقى البلوفر على ابر نمره 4 ونص واشتغلت حوالى شبر و4 قراريط يعنى اربع صوابع تمام وقسمت الظهر على 3اقسام

قفلت 15 اللى هى اول كتف ونسلت 10 غرز على دبوس اللى هى حردة القفا ونقفل 15 غرزة اللى هى الكتف التانى

ده فى حالت انىاشتغلت البلوفر كم ساقط يعنى من غير حردات لوحبيتى تشتغلى بلوفر بكم عادى تشتغلى مقام شبر وتعملى الحرده وهى فى الاطفال 2و1بمعنى اول سطر فى الحرده بتنقصى غرزتين وتكملى السطر عادى ومن اول السطر بتنقصى غرزتين وتكملى السطر والسطر اللى بعده بتنقصى غرزه واحد من اول السطر وتكملى السطر عادى والسطر الجديد بتنقصى غرزه وتكملى شغلك عادى لحد لما يبقه طول الشغل شبر و4 قراريط وتقفلى زى ماوضحت فى السابق

الصدر زى الضهر بالظبط فى حالة انك ماعملتيش حرده لو عايزه حرده بتنقص بعد الشبر 3 و2 و1 وتكملى وقبل الطول المطلوب اللى هو شبر واربع قراريط قبليه بقراطين قفلى 12 غرزه الكتف الاول واسلتى على دبوس 16 غرزة وقفلى ال12 غرة الباقين اللى هما الكتف التانى نسيت اقولك انك بعد ماتقسمى الاكتاف كل كتف ببكره لوحده يارب اكون عرفت اوصل

[جدة مازن]

الكم اشتغلته 25 غرزه البليسه وقبل مانقل على الابر الكبيرة ازود 10 غرز واشتغل عادى حوالى شبر فى حالة الكم الساقط واقفل مرة واحده اما فى حالة الحردة بشتغل حوالى شبر واحرد من الاامام 3و2و1 ومن الناحية التانية 2و1
بمعن وش الشغل فى 3و2و1وظهر الشغل 2و1 اى استفسار انا حاضره

كده خلص البلوفر نخيط الكتف الامامى مع الكتف الخلفى ونلقط الغرزه اللى على الدبوس بمعنى اخد 8غرز من على دبوس الامام واللقط دوران البلوفر لحد ماوصل لدبوس القفا واخد منه 5 غرز واشتغل بالابر العادية بس وانا بشتغل اخد غرزة من على الابرة وغرة من جسم البلوفر واشتغل مسافةشبر واقفل وارجع اسلت باقى الغرز اللع على دبوس الصدر واللقط من الجهة الاخرة الى ان اصل الى غرز القفا وزى ماعملت فى اليمين اعمل الناحية الشمال ولما اخلص اخيط الجزئين مع بعض واقفل من فوق اى استفسار انا حاضره

[ام عمرو]

وعليكــم السـلام ورحمة الله وبركاتـه..

وأنا أقول المنتدى منور وأنواره تتلألأ

شرح جميل ووافى حبيبتى تسلمى

هيا يا بنات إبدأن التطبيقات

[فورته]

اهلا بالجدات الخبيرات .. متعكم الله بالصحة ..

جدة مازن الصورة لم تنزل ..

[*الورد الجوري*]

السلام عليكم و رحمة الله و بركاته

يا خبيرات واحدة واحدة علينا احنا لسه سنة اولى

اقترح ان نبدا بالحاجات الصغيرة و يا ريت خطوة خطوة عشان ما نتوهش

يعني مرحلة تخلص ندخل في اللي بعدها

[جدة مازن]

ماشى ياورد تحبى تبدئى بأيه فى انتظار ترشيحك اللى تحبى تشتغليه

[ام عمرو]

السلام عليكــم ورحمـة الله وبركاتــه ،،

أنا عندى إقتراح

نحن نضع مثلا طريقة بلوفر كبير وبيبى وأطفال ثم نضع الأساسيات التى نتبعها من كيفية القياس وخلافه وعدد الغرز

ثم نضع بعض الغرز ويكون هذا مرجعا لمن تريد أن تنفذ أى عمل مثل تجربتى أنا مثلا فأنا لدى كتاب به غرز فقط وباب خصص

للتعليمات ثم بضع نماذج فقط من العمل المتكامل من شراب جوانتى بلوفر بطانية مثلا وخلافه ثم أنا تتبعت ما كتب وبعدها

بدأت التطبيق لما أحتاجه فالخيوط تختلف نوعياتها فمن غير المعقول أننا ننفذ كل ما هو موجود فى الدرس وإنما نأخذ ما يصلح

تعديله وتنفيذه وفقا لإحتياجاتنا بعدها نتواجد للإجابة عن أى تساؤل من المشتركات ......


بالطبع تظل الدورة ونضع كل أسبوع ما يكون جديدا وفق المتاح ونترك حرية التنفيذ دون التقيد بعمل بعينه ....

أرجو إبداء الرأى يا أستاذتنا فورتة وأستاذتنا جدة مازن

[*الورد الجوري*]

كلام جميل كلام معقول مقدرش اقول حاجة عنه يا ام عمرو

يا جدة مازن ممكن نبدا بكنزة بيبي او طفل لاني حاسة انها هتخلص بسرعة و هفرح اني عملت حاجة تتلبس و ممكن

اهديها لحد و تبقى من صنع ايدي و حاسة انها اسهل للمبتدئات اللي زيي

ولا ايه رايكم يا اساتذة

انا عارفة تعباكم معايا

[ام عمرو]

السلام عليكــم ورحمـة الله وبركاتــه ،،

وردنا الجورى الغالية جزاك الله خيرا حبيبتى وأشد على يدك لأنك لديك طموح ما شاء الله وفقك الله غاليتى ....

فى انتظار جدة مازن حبيبتنا بكل شوق

[فورته]

[جدة مازن]

صباح الفل على الحلوين بصى ورد ممكن تعملى بدله لطفل حديث الولاده يعنى بلوفر وبنطلون بيخلص بسرعه ابدئى بلبلوفر لو الخيط سميك اعملى بداية 30 غرزة على ابر نمره 4 ولوخيط متوسط السمك ابدئى 40 غرزه برضه على ابر نمره اربعه واشتغلى البليسه غرزتين عدل وغرزتين مقلوب وخلصى البليسه وقوليلى وانا فى انتظارك وياسلام لو خيط ملون فى بعضه مش حتحتاجى انك تعمليله غرزه لانه بالغرزه المرنه بيديلك منظر جميل ايه رايك حبيبتى

[ام عمرو]

ما شاء الله على الأفكار

تحيا جدة مازن

كلنا وراءك حبيبتى

[طموحة]

ما شاء الله ما شاء الله

يا سلام عليكن يا غاليات ربي يوفقكم


ويسعدكم

[فورته]

مرحب ياطمووووووووحة انت فين .. صباحك فل

اخبارك ايه اوعى تكونى كسلت .. لا كسل مع الطمموح ..هههههههه

[*الورد الجوري*]

السلام عليكم ورحمة الله وبركاته،،


معلش اتاخرت عليكم اصل النت كان فاصل اليومين اللي فاتوا

ان شاء الله انزل اشتري الخيط و اتابع معاكي يا جدة مازن

الله يعطيكي العافية

[جدة مازن]

ماشى ياجميلة اشترى الخيط ونادى وعلى طول على طول تعملى احلى بلوفر فى انتظارك

[طموحة]

مرحب ياطمووووووووحة انت فين .. صباحك فل

اخبارك ايه اوعى تكونى كسلت .. لا كسل مع الطمموح ..هههههههه

لا بس انشغلت في البيت الفترة اللي راحت

ومازلت أحاول ألأقى فرصة


وبإذن الله بشتري خيوط جديدة وأبدأ من جديد

أنا فعلاً نفسي أعمل بلوفر مفتوح

ومسكر



ما ذا يلزمني لعمل البلوفر

خيوط

سنارتين مناسبتين للخيط

وسنارة دائرية للرقبة

وماذا أيضاً؟

[فورته]

ناقص العزيمة وتبدئى ... احنا فى انتظارك .. اشترى خيط سميك ليعطى لك نتيجة اسرع

وأسألى البائع على عدد الشلل التى ستحتاجين له وحجم الصنايير المناسبة للخيط

ونصيحة جدة مازن يكون الخيط جنجاه .. يعنى ملون منه فيه ..