15 رد (ردود) على هذا الموضوع

[بلسم القلوب]

السلام عليكم
هذه الدوره منقولة من أحد المنتديات النسائية وحبيت أنقلها لكم لأهميتها
ولكن لا تنسون الدعاء لصاحبة الموضوع وجزاها الله عنا خير الجزاء لإهتمامها
في كتابة ما يفيد أخواتها المسلمات ...أما أنا فمجرد ناقلة للموضووع فقط .....


]|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

توجهيها :

لكل متزوجة / لكل مقبلة على الزواج / لكل فتاة أرادت الإستفادة ..

هدفها:

كسب الزوج الحبيب بطرق عملية سهلة و بسيطة ..

أدواتها : ورقة و قلم / متابعة / إرادة و تنفيذ ..




|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

خلونا نبدأ دورتنا بـ (( الحب ))

إحنا كحريم و كبنات و كأناث عموماً الحب هو الغالب علينا و متملكنا .. حبنا للأهل للوطن للأحبة ..

بس كثير من المتزوجات يجهلون حبهم لأزواجهم .. فعشان نكون على بينة كلنا .. راح نعرّف (( الحب ))

الحب عندنا نوعين :

1- حب مطلق

يعني تحبين بدون حدود و بدون شروط و بدون قيود .. مطلق عام ..

2- حب مشروط

يعني كأنك تقولين لزوجك ( راح أحبك بس / إذا اشتريت لي حاجة معينة أنا أبغاها ... ) ..

*
*

لو جينا للنوع الأول : الحب المطلق :

هذا هو الحب المطلوب منك كزوجة .. تحبين زوجك حب مطلق .. و لا تخلين أي عائق يواجهك في الحياة يمس شي بسيط من ذاك الحب ..

يعني اتفقتي معاه على إنه يجيب لك شغلة مهمة .. و لما رجع للبيت قال لك : اوووو نسيت ..

مثل هالموقف لا تخلينه يأثر في حبك أو يخليكي تكرهينه .. أنتي يمكن تكرهين التصرف نفسه

لكن ما تكرهين زوجك .. و في فرق أكيد .. لأن في قاعدة تقول :: فرّق بين الفعل و الفاعل :: إحنا نكره أفعال أو تصرفات معينة اصدرت من قبل أشخاص لكن ما نكره الاشخاص أنفسهم ..

أكيد من خلال جلساتكم .. صادفتوا و سمعتوا فلانة تقول : ( بديت أكره زوجي لأنه مهمل بيته ) و المفروض إنها تكره إهماله مو تكرهه هو ..
عموماً :: ابي كل وحدة فيكم تقول و تردد بينها و بين نفسها

( أنا أحب زوجي لذاته .. و ما راح أخلي أي تصرف طارئ يهز شي من حبي له )



الطيبون للطيبات .. و الخبيثون للخبيثات ..

سمعناها كثير .. هي قاعدة قرآنية يماثلها مثل دايماً نردده ( الطيور على أشكالها تقع ) تعرفونه أكيد .. و في قاعدة روحانية تأكدها ( الأرواح المتشابهة تلتقي ) ..
لو جينا لحياتنا .. و أعطيكم على نفسي مثل :: أنا وسط أهلي و أستحقهم و يستحقوني .. ليش ؟ لأن إحنا أكفاء و متشابهين كثير ..

إرتبطت بزوجي .. لأنه هو اللي يناسبني .. بس من أي ناحية ؟؟ ناحية أرواحنا تتشابه ..

أنتي و زوجك .. ارتبطتوا ببعض .. ليش ؟ لأن أرواحكم متشابهة .. أنتي تستحقين هالزوج .. و هو يستحقك ..

مستواكي و مستواه متشابهين من أي ناحية ؟ ناحيةالمستوى الروحاني نفسه عشان كذا صار بينكم تجاذب

هذا التشابه يلغي الفوارق .. إحنا دايماً نركز على إن الشخص هذا وسيم و غني ... الخ يعني لازم ياخذ وحدة من مستواه المادي !! و نتفاجأ إنه أخذ وحدة مستواها المادي أقل منه ..

و سمعنا كثير ( أنا جميلة و جامعية و من عايلة لها مركزها ) و نشوف إنها تزوجت من شاب عنده ثانوية عادي بحياته الإجتماعية ..


دايماً ننهي إستغرابنا بإنه (( نصيب )) هو نصيب و الله كاتبه فعلاً .. لكننا غفلنا عن مسألة تشابه الأرواح .. يعني من اليوم و رايح لو شفتوا حالات مشابهة قولوا (( هذا نصيب و تشابه أرواح و الله سبحانه و فق بينهم )) ..

و في بنات تزوجوا من ناس أكبر منهم أو أغنى أو أكثر وجاهة ... الخ لكن مستوى الزوج هذا هو نفسه مستواها .. و حريم تطلقوا من أزواجهم و تزوجوا غيرهم .. و هكذا ..

طيب و الحل ؟

هم حلين :

1- تتكيفين مع الوضع الحالي .. و تحسنين من طرق التعامل .. و تمشين معانا لآخر الموضوع ..

2- إنكم تنضجون مع بعض عشان تحققون سعادة أكثر و فهم أعمق ..
إذا و لا حل اعجبك .. اطلبي الطلاق .. هااه وش قلتي ؟

قرري من الحين :

تبين تستمرين ؟ إذا جاوبتي بـ لا .. لا تنتظرين و اطلبي الطلاق .. بس تأكدي إن هذا نصيبك و هذا مستواك و ما راح تلقين أفضل منه من ناحية الروحانية ..

إلا إذا قررتي إنك تنضجين .. و أنا أنصحك إنك تنضجين معاه في نفس الوقت ..

و إذا جاوبتي بـ نعم .. اشتغلي على نفسك من الحين و إسعي عشان تحسنين و تعدلين من علاقتكم ..




الواجب الأول :

خوذي ورقة .. و كتبي عليها من فوق ( ورقة المفاهيم ) .. و بعدها اكتبي الجملة الجاية :

سأطبق جميع الواجبات و التمارين




هاذي حلقتنا الأولى من الدورة .. أتمنى إني قدرت أوصل لكم اللي أبغى أوصله ..

بس يا ليت من كل وحدة ترد .. تعطيني رأيها : أستمر أو لا ؟ و بتكون متابعة معانا أو لا ؟

*
*
*




الحلقة الجاية : 3 شروط للسعادة الزوجية

أكمل ولا ؟؟؟؟؟

[كليوباترا مصر]

الله عليكي تسلمي مميزه والله

[darimania]

تسلمي عزيزتي على طرحك الموضوع المهم

معلومات مفيدة لنا جميعا

يعطيكي العافية

[لـــوووتـــس]

موضوعك حلو كثير وياليت تكملين

ننتظرك بشغف

[بلسم القلوب]

ان شاء الله قريبا حبيبتي لوتس
اشكرك على المرور الطيب

[بلسم القلوب]

نبدأ على بركة الله ..


|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|


الشرط الأول :: السعادة تبدا من الداخل ::

وشلون تبدا من الداخل ؟

يعني لا تظنين إن لما يكون عندك فلوس و صرتي غنية يعني لازم تكونين سعيدة

أو لما تكونين صاحبة أعلى الشهادات إذا لازم تكونين سعيدة

أو لما تكونين صاحبة مركز مرموق يعني لابد تكونين سعيدة

أو لما تكونين آية في الجمال يعني أنتي سعيدة

المال و الوجاهة و المناصب و الجمال ما هي إلا وسائل تعين بس ما تصنع السعادة أنتوا معاي ؟؟

بإختصار إذا ما كنتي سعيدة من من الداخل ما راح تحصلين على السعادة في الخارج ..

خليني أهمس في أذنك أختي العزيزة و أقول لك ( إذا ما كنتي سعيدة من الداخل ما راح تقدرين تسعدين زوجك و لا اعيالك و لا أي أحد من اللي حولك .. لأن فاقد الشي لا يعطيه ) ..

عشان كذاأقول لك خلي البداية منك و في نفسك .. تعلمي وشلون تكونين سعيدة حتى لو كنتي وحيدة ..

حريم كثير هم في الأصل مو سعيدين .. فلما تصير لهم مشكلة مع أزواجهم أول شي يسوونه يلقون اللوم على أزواجهم و إنهم السبب في عدم سعادتهم أو تعاستهم ..

*
*

عشان نتعلم وشلون نكون سعداء عشان نسعد .. أو تتعلمين اشلون تُسعدين عشان تِسعدين .. تابعوا معاي الفقرة الجاية ..



في نظرية ملخصها ( إيفاء حقوق 4 جوانب في الحياة ) .. و الجوانب هي :

الجانب الروحاني
الجانب الإجتماعي
الجانب العقلي
الجانب النفسي
خلونا نفسر النظرية و بإختصار شديد ..

تفسيرها : إن اللي بيعطي كل جانب من الجوانب اللي ذكرتها حقه بيكون سعيد بإذن الله ..

طيب الحين راح نوضح كل جانب و بشكل سريع :

الجانب الروحاني :: هو جانب معانيه عميقة جداً .. متصلة بالروح .. مثل الإيمان و التوكل و الإنتماء و القيم الإجتماعية ..

الجانب العقلي :: متعلق بالجانب الثقافي و العلمي و النفسي ..

الجانب الجسدي :: متعلق بالجانب الفسيولوجي البدني الجسماني ..

الجانب الإجتماعي :: هو المتعلق أكيد بالأسرة و العائلة و المجتمع ..

تذكرنا هالجوانب و إيفاء حقها بقول الرسول عليه الصلاة و السلام : || إن لربك عليك حقاً , و إن لأهلك عليك حقاً , فأعط كل ذي حق حقه || , و في رواية || و إن لجسمك عليك حقاً || ..

عشان تحققين و توفين كل جانب حقه .. وشو المطلوب منك كزوجة أو كأم ..

المطلوب : تقسيم الأعمال اليومية على الجوانب الأربع .. ساعة لربك و لعبادتك / ساعة للرياضة و النوم / ساعة للتعلم و القراءة / ساعة للأهل و الأولاد و العايلة .. لا تنشغلين بشي على حساب شي .. و بإذن الله بتكونين من السعداء ..

** ملاحظة : ما أقصد ساعة بمعنى ساعة و إنما وقت كاف لإيفاء جانب حقه لكن بشرط ما يطغى على وقت جانب آخر ..

*
*
*

بكذا .. نكون خلصنا الشرط الأول لتحقيق السعادة الزوجية ..

دورة : كيف تكسبين محبوبك ||,",|| للمتزوجات و المقبلات على الزواج ||,",|



نكمل شروط السعادة الزوجية .. ذكرنا الحلقة اللي فاتت شرط و هو :: السعادة تبدا من الداخل :: و عرفنا اشلون نُسعد عشان نسعِد ..

*
*

الشرط الثاني :: أنتي المسؤولة عن إسعاد نفسك ::

خلونا نتفق من هنا على إنك أنتي المسؤولة عن سعادتك محد غيرك ..

لا تعيشين في دائرة الإسقاطات اللي يعشيها الشخص الغير السعيد .. ( مب أنا المشكلة .. المشكلة إن زوجي .. أهلي .. المدير .. السحر .. الشيطان ... الخ هالإسقاطات ..

السعداء هم الذين تحملوا مسؤولية إسعاد أنفسهم

تذكري أختي الغالية .. إنك لما تبغين سلعة غالية .. أو شغلة باهظة الثمن .. راح تسعين بكل ما اوتيتي من قوة عشان تحصلينها و بالتالي تقدرين تتصرفين فيها ..

خلي سلعتك الغالية ( السعادة ) اللي تحتاج إلى جهد و تضحيات و صبر عشان نحققها ..و تحملي مسؤولية السعادة بنفسك و لا تلقين الحمل على الزوج و يصير هو المسؤول عن كل شي حتى سعادتك !!

قاعدتنا الأولى كانت :: السعادة من الداخل :: <<< خلك متذكرتها على طوول ..



الشرط الثالث :: عشان نغير في الغير .. لازم أبدأ التغيير من نفسي أول ::

خلوني أذكر لكم قصة قصيرة تتعلق بهالشرط ..

في رجل نوى إنه يغير العالم .. و قعد على هالحال 20 سنة .. لكن و لاشي تغيّر ..

قرر يغير دولته .. حاول و حاول 10 سنين .. لكن و لاشي تغير في دولته ..

فقال : خلني اغير في مدينتي .. و فعلاً بدا محاولات التغيير لمدة 5 سنوات .. لكن و لا شي تغير !!

قال خلاص بأغير في الحي اللي أنا أسكنه .. عل و عسى يتغير شي .. حاول و حاول و حاول

لكن ما تغير شي ..

انتقل بعدها يبي يغير في بيته .. و استمر في محاولاته سنين .. لكن و لاشي تغير !!

في الأخير أدرك إنه لازم يغير من نفسه و هذا اللي سواه ..

**

و أنتي عزيزتي .. بتنتظرين 40 سنة عشان تكتشفين هالحقيقة ؟؟؟ حقيقة إنك لازم تغيرين من نفسك ؟؟ أكيد لا .. من منا يضمن عمره ؟!!

عشان كذا أبي كل وحدة تقول :: أنا ما أقدر أغير زوجي أو أولادي أو أهلي أو صديقاتي ,,, لكني قادرة أغير في نفسي.. يمكن لو غيرت من نفسي .. يتغيرون هم تجاهي ::

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|**

كيف تتغيرين ذاتياً .. و تغيرين واقعك للأفضل

الجزء هذا راح يكون عبارة عن تمرين حلو و بسيط ..

هو تمرين فكري له مفعوله العجيب .. و من فوايده :

1- يخرج الشحنات السلبية من العقل الباطن .

2- يثبّت الأفكار الإيجابية .

3- يجلب القدر المطلوب لك .

4- يزيد الثقة في النفس .

5- ينبه إلى أمور معينة و غيرها مكبوتة ..

*
*

وشلون بنسوي هالتمرين ؟!


الطريقة جداً سهلة مثل ما ذكرت لكن تتطلب الصدق .. و تفضلوا :

1- اكتبي (( أنا أحب ..... " اسم زوجك " و هو يحبني )) و تلفظيها .

2- اكتبي أول ردة فعل في بالك بعد ما تلفظينها ,, أي ردة فعل .. سواء كانت إيجابية : " أنا فعلاً كذا " .. أو سلبية : " لالا يحبني و لا شي " .. أو محايدة : " يا ليت " .. أو ما لها علاقة : " كأني ما اتصلت في أمي اليوم ؟؟ " .. يعني أول رد فعل في عقلك ..

3- كرري الفعل 5 مرات .. يعني اكتبي نفس الجملة الأولى و بعدها اكتبي ردة الفعل الأول .. لحد ما تكملين الـ 5 مرات .. لكن لا تحللين حاجة ..

4- اكتبي الحين (( ..... " اسمك " تحب ..... " اسم زوجك " و هو يحبها )) و تلفظيها .

5- اكتبي أول رد فعل على طووول ..

6- كرري 5 مرات ..

7- اكتبي (( أنتِ " الخطاب موجه لك " تحبين .... " اسمه " وهو يحبك )) و تلفظيها ..

8- اكتبي أول ردة فعل ..

9- كرري 5 مرات بعد ..

** التمرين هذا تسوينه لما تكونين بروحك .. في خلوة و بدون أي مقاطعات ( لا تلفزيون .. لا تلفون .. لا شرب شاي ... الخ ) يعني تقعدين تسترخين على الآخر تفضين نفسك من أي عمل .. و تبدين في التمرين ..

و إذا صار و جا واحد من الأطفال يبغي حاجة .. أو زوجك وصل و قاطعك .. يعني حدث شي قطع التمرين عيديه من الأول ..

اتفقنا ؟

** الشي الثاني .. التمرين لازم تسوينه لمدة 14 يوم متواصلين .. إذا نسيتي يوم تبدين من جديد ..
يعني لو بديتي التمرين لمدة 10 ايام و نسيتي يوم واحد .. تعيدين التمرين من جديد ..

في اليوم إذا صار إنقطاع .. تعيدين التمرين نفسه .. يعني في اليوم الأول كتبتي و كررتي بدون أي إنقطاع .. جيتي اليوم الثاني .. و بديتي في التمرين لكن رن التلفون فجأة وقطع عليك .. عيدي الخطوات من رقم 1 ..

واااضح ؟

** لا تحللين ردود الأفعال .. اكتبيها بس .. و عقب حلليها لما تخلصين الـ 14 يوم ..

** إذا حسيتي إن المعلومات سرية تقدرين تتخلصين من ورقة التمرين في نفس اليوم أو لما تخلصين الـمدة 14 يوم ..

** إحتمال تاخذ الجلسة الوحدة من 10- 15 دقيقة .. كثير ؟ أكيد لا ..


*
*
*

مثال للتمرين .. للتوضيح أكثر :

الزوجة اسمها عايشة //// الزوج اسمه محمد ( اللون الأزرق = ردة الفعل )

1- انا احب محمد و محمد يحبني = بس إنه يتصرف و كأنه ما يحبني.

2-انا أحب محمد و محمد يحبني = كان يحبني في بداية زواجنا .

3- أنا أحب محمد و محمد يحبني = أتمنى لو تتحسن علاقتنا ..

4- أنا أحب محمد و محمد يحبني = اووو شهالتمرين ؟
.
.

عايشة تحب محمد و محمد يحب عايشة = يا ليت ..



عايشة تحب محمد و محمد يحب عايشة = يا رب ساعدنا هههه .

.

أنتِ تحبين محمد و محمد يحبك = كلام فاضي !.
.

و هكذا .. أتمنى وضح لكم التمرين ..

*
*
*


عايشة تحب محمد و محمد يحب عايشة = يا رب ساعدنا هههه .

.

أنتِ تحبين محمد و محمد يحبك = كلام فاضي !.
.

و هكذا .. أتمنى وضح لكم التمرين ..

*
*
*

[بلسم القلوب]

نستكمل دورتنا .. و نبدأ الجزء الجديد بطرق عملية لكسب الحبيب ( الزوج ) .. مستعدين ؟



أول الطرق :: حبي زوجك حب مطلق ::

تذكرون لما تكلمنا في بداية الموضوع عن الحب .. و ذكرنا أنواعه .. و منها :: الحب المطلق ::
جا الدور عشان نطبق هالحب المطلق .. وشلون ؟

يعني حبي لزوجي لازم و ركزوا على كلمة لازم .. يكون حب مطلق بدون قيود و لا شروط ..

حبي زوجك مهما صدر منه .. يمكن تزعلين / تعصبين / تنقدين / تحزنين ,, معه و عليه بس و لا شي

يأثر على حبك له .. و لازم تأكدين له هالشي ..

مثال على ذلك ::

زوج وقف امام ( المرايا ) .. و قال لزوجته : تخيلي لو أصلع ؟؟

ممكن تجاوبه زوجته ( اسم الله عليك توك صغير ) أو ( خل عنك الوسواس و إذا صلعت يحلها الف

حلال و ياكثر عمليات زرع الشعر الرخيصة و الفعالة ) و الأسوأ من هذا كله إنها تجاوبه ( لا ,,

لا تقول .. ما أقدر أتخيلك مصلع ) .. بس الزوجة الذكية و اللي تحب حب مطلق بتجاوب

( حتى لو صلعت يا حبيبي ما راح يتغير شي .. راح تكون محبوب مثل ما أنت الحين )

**

مثال ثاني ::

في يوم رجع الزوج من الدوام .. و سأل زوجته : وش بيصير لو ماعطوني ترقية ؟ .. زوجته ممكن

تجاوبه ( لازم تاخذ الترقية .. إحنا محتاجين للعلاوة المالية اللي بتطلع من وراها )

و الأسوأ إنها تجاوبه بـ ( وشوو ! من بكرة تروح تقابل المسؤول و تطالبه بالترقية )

بس المفروض إن الزوج يسمع (ابوفلان .. و لاعليك يا غالي .. هم الخسرانين .. راتبي و راتبك بيكفونا أو راتبك بيكفينا و بيزيد بإذن الله )

شفتوا الفرق ؟

كذا نبيك تكونين مع زوجك .. و كذا نبغي حبك له .. يكون حب مطلق ..

كلنا سمعنا عن زوجات تخلوا عن أزواجهم يوم فلسوا ! أو يوم ينسجن و يتخلى عنه المجتمع !

أو أو .. تأكدوا إن مثل هالزوجات .. ما اعرفوا معنى الحب المطلق و لا مارسوه ..

للمرة المليون أكرر :: حبي زوجك حب مطلق :: حبيه إذا أحسن و كافئيه بالإحسان ..

حبيه إذا أساء و كافئيه بالغفران و المسامحة .. حبيه إذا عطى و كافئيه بالشكر .. حبيه إذا قصر

و كافئيه بالستر ..

و حطوا في بالكم خواتي .. إن اللي تحب زوجها ما تتكلم عنه بالشينة مثل ما نقول في العلن و قدام

الخلق .. و لا تكشف له ستر .. و كلامها كله عنه بالخير ..

إذا الحب المطلق = سر الوجود

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|



ثاني طرقنا :: انتبهي الزوج دايماً يختبر ::

من الحاجات اللي لازم تنتبه لها الزوجة .. إن الزوج يختبر حب زوجته له كل يوم تقريباً .. بوعي

و بدون وعي ..


أعطيكم مثال ::


تعطلت سيارة البيت اللي يستخدمها السواق عشان يودي الزوجة و الأولاد .. و اضطر الزوج في

ذاك اليوم إنه يوديهم لبيت أهلها و في الرجعة ترجع مع سواق بيت أهلها .. و هناك قالت أم

الزوجة : يا بنتي لازم تصلحون سيارتكم .. مب زين تظلون كذا بدون سيارة ..

و لما رجعت الزوجة البيت و اقعدت مع بو العيال قالت له : ( أمي تقول لازم تصلحون السيارة ) ..

ممكن هنا الزوج يختبرها عشان يعرف وزن كلمته عند أمها .. فيقول لها ( أنا أشوف إن نأجل

الموضوع شوي على الأقل لين الشهر الجاي أضمن إن السيولة المادية توفرت عندي .. اشرايك ؟ )

الزوجة لما ترد عليه ( بس عاد أمي قالت .. ) ما راح تنجح ..

لأن ردة فعله بتكون يا إما إنه بيعصب من خلال رده : ( يعني كلامي و لا كلام الوالدة ؟ ) .. أو

بيكبت .. و طبعاً ردة الفعل المكبوتة تكون أشد خطورة .. فإنتبهي عزيزتي الزوجة

و تذكري :: طاعة الزوج مقدمة على الوالد/ة و غيرهم شرعاً و عرفاً

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

نستكمل طرق كسب الزوج الحبيب .. و ذكرت طريقتين : حبي الزوج حب مطلق / كوني ذكية في إختبارات زوجك ..

ثالث طريقة :: كوني مستمعة جيدة ::


يجي وقت على الإنسان .. يبي من يسمعه .. و هاذي حاجة أساسية له ..

فما بالك بالزوج اللي محتاج أكيد لإنسانة تحبه و تفهمه و تسمعه لا من بغى يتكلم .. و تأكدي

عزيزتي إن الزوج لو ما لقى اللي يفهمه في محيط بيته .. راح يدور عن ذاك الشخص .. و يمكن

عن زوجة ثانية أو عن علاقة ثانية ! لا تستغربين و لا تستبعدين هالشي .. لذلك أنتي

اللي لازم تسمعينه و تفهمينه ..

نسمع عند حريم متزوجات من سنين .. و تلقين الوحدة فيهم تقول :: أنا ما فهمته لحد الحين ::


و أنا اقول لها .. متى بتقررين تفهمينه ؟ أو وش كنتي تسوين طول هالسنين ؟؟

و الصراحة اللي ما فهمت زوجها مهما كانت مدة زواجها .. اسمحوا لي أقول لها :: أنتي

ما تسمعين له عشان تفهمينه ::

تدرون خواتي .. إن السماع و الإنتباه واجب عليك كزوجة ؟

لأنه ليس من الأدب .. إن الزوج يتكلم سواء في موضوع مهم أو غير مهم .. و يتفاجئ بالزوجة

سارحة في عالم ثاني مثلاُ ! أو منشغلة بالطفل اللي بيدها أو المجلة أو أي شي ثاني ..

لذلك خواتي :: متى ما طلب منك الزوج الإنتباه .. انتبهي له و اسمعيه .. و لا تنشغلين بشي

إلا بعد ما تستأذنينه ::

يعني اعتذر منه و قولي له ( ممكن حبيبي نأجل الموضوع لوقت ثاني .. أو بعد ما أخلص الشغلة

اللي في يدي ) ..

على شرط لما تفضين .. ترجعين تسألينه عن الموضوع نفسه .. معاي ؟

و تأكدي عزيزتي .. إن الزوجة اللي ماتسمع زوجها و تفهمه راح تواجه متاعب عاجلاً أو آجلاً ..

لأن الإستماع فن .. تعلميه عشان تحافظين على زوجك للأبد

طيب وشلون اسمعه ؟


بسيطة ..

لما يدخل أسأليه عن شغله .. اسأليه عن طموحاته و إهتماماته ..

( ابو فلان ! وشو اللي تتمنى تحققه ؟ ) ( وشلون كان شغلك اليوم ؟ ) و الأمثلة كثيرة ..

لـــــكـــن انتبهي عزيزتي الزوجة ..

لا تكثرين من الأسئلة ..

يعني لو سألتيه و تجاوب معك .. استمري معاه لحد ما ينهي كلامه ..

و إذا ما تجاوب .. وقفي لا تسألينه .. لأنه يمكن يكون تعبان .. أو ما عنده رغبة في الكلام أو

مشغول في موضوع معيّن ..

مازال هناك المزيد تابعوني

[عزوت اخواني]

بصراحة موضوعك اكثر من رائع فيه الكثير من المعلومات والفوائد وخاصة للمقبلين على الزواج
يعطيك العافيه

[بلسم القلوب]

]|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

نكمل ؟ مستعدين ؟

رابع طريقة :: أكثري عليه الثناء و المدح ::



تعرفون لما يجونكم أشخاص .. و دايماً يرددون : وشو اللي فيني ينحب ؟ أنا أحس نفسي عادية ؟

أو ما عندي جمال ؟ أو أو أو .. وقتها وش بتسوووين ؟ أكيد بتحاولين ترفعين من معنوياتها

و بتجاملينها .. صح ؟

لا من قال إلا ما شاء الله أنتي جميلة .. أو أنتي ذكية .. و عندك حاجة مو موجودة في الغير ..

بتقولين هالكلام خاصة إذا كان الشخص يعني لك كثير .. صديقة / أخ / أخت / حتى الزوج

نعم الزوج .. تدرين ليش ؟

لأن في أزواج يجونك مو عارفين و لا حاسين بذاتهم لا مع أزواجهم و لا اعيالهم و لا في وسط بيتهم .. طيب وين

بيحسون بهالشي ؟


أنا أعلمك ؟

أنتي تعرفين تجاملين و تمدحين فلانة و غيرها .. صح ! طيب خلي هالمديح و الثناء كله لزوجك ..

تعرفين عزيزتي ::

إن المديح و الثناء صفتين من صفات الناجحين و السعداء ..

بعض الزوجات .. ما يحسون بالنعمة اللي عندهم من مسكن / مصروف / سكينة / أولاد ... الخ ..

طيب يا عزيزتي الزوجة المتذمرة .. ليش ما تشكرينه على نفقته ؟ على دفعه للإيجار مثلاُ ؟

اشكري الزوج دايماً .. إذا شرا لك حاجة و لا لأولادك حتى لو كانت حاجة بسيطة .. سندويتشات أو عصير ... اي شي ..

اشكريه - و هالكلام للمتزوجات فقط - بعد المتعة الجنسية ( بطريقتك أكيد ) .. أو إذا احضنك أو باسك .. أو عامل اعياله بحنيّة ..

امدحيه دايماً لكن تخيري الأوقات .. امدحيه قدام اعيالكم ..

مثلاً قولي لولدك : " أبوك قوي ما شاء الله "

أو قولي لبنتك : " أبوك محد مثله "

أو قولي له هو .. و عبري له .. خلي هو الـ your hero = البطل اللي ما في مثله ..

لا تقولين أمزح عليه .. بالعكس أنتي كذا تحسسينه بذاته .. و إنك مفتخرة فيه لأنه كذا و كذا ..

**


تدرون عزيزاتي .. إن لو الزوجة امدحت و اشكرت زوجها على كل حاجة و كل شغلة حتى لو كانت

بسيطة .. وش بتكون ردة فعل زوجها ؟ الإحسان لها ..

لأن الرجال من طبعهم ( خذوها نصيحة ) يحفظون كل تصرفات المرأة .. و يردونها

لها في مواقف ثانية ..

غير إنك لما تقومين بهالشي .. بتكونين وفية .. يا سلام ! من منا

ما تبي تكون وفية لزوجها .. تحفظ له كل فعل طيب و كل قول حسن .. و تذكر له هالشي و لغيره ..

( يعني يا عزيزتي لما تقعدين مع خواتك أو خواته و أمه ( أهم الأشخاص ) لا تطرين لهم زوجك

إلا في الخير و امدحيه .. بتكبرين في عينه و في عينهم ..

]|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|



خامس طريقة :: استقبلي المصاعب بالحوار ::

ركزوا معي يا أخواتي .. الجزء هذا طويل نوعاً ما

يا ترى هو في مصاعب راح تواجهنا ؟ أو واجهتنا و انتهينا منها ؟ طيب في غيرها جاي ؟ ...

أسئلة كثيرة يمكن تطرى على بال الكثيرات .. أنا أقول لكم يا خواتي .. نعم ..

ما في أسرة سعيدة 100 % .. و ما في أسرة خالية من المشاكل ..

و للمشاكل وجهين : سلبي / إيجابي ..

ممكن تكون مشاكلنا سبب في تعاستنا ..

و ممكن تكون سبب في إن الحب يتوطد و يتعمق أكثر ..

طيب هي مشاكل !! معقولة المشاكل توطد الحب ؟

معقولة .. لأن الحب ما يتعمق إلا إذا تعدى الزوجين المشاكل و المصاعب ( مع بعض )..

عرفتوا ؟ عشان كذا إحنا نقول - و أنا مؤمنة بهالشي - حب فترة الملكة

مب مقياس يخلينا نقول إنه ( حب بلا مشاكل أو مصاعب ) ..

لأن الشخص اللي قدامك ما انعرف معدنه لحد الحين ..

و أحسن طريقة لإستقبال المشاكل و المصاعب هي ( إستخدام الحوار البناء ) ..

*
*
*



حوار <<----- حب ----->> بناء

كلمة ( حب ) تتكون من حرفين الحاء و الباء .. خلها تذكرك بـ ( حوار بنّاء ) ..

و للحوار الفعّال بين الزوجين 3 قواعد رئيسية :

1- الإفصاح بدقة عن مشاعرك .

2- الإستماع بإنصات إلى الطرف الآخر .

3- تقبل مشاعر و رأي الطرف الثاني حتى و لو كانت المشاعر و الآراء مختلفة عنك .

إذا هالشروط ما تحققت = الحوار غير فعّال و ما منه فايدة .. و الزوجين بيكونون في حاجة لتدخل

أطراف متخصصة ( و إحنا نتمنى قد ما نقدر إن ما نوصل لهالمرحلة ) . .

طبعاً لا تنسين عزيزتي .. تعطين زوجك فرصة إنه يتكلم .. و لازم بيكون في تنازل عن راي ( سواء

رايك أو راي زوجك ) إذا في راي أصح منه ..

خلونا نشرح القواعد الرئيسية الـ3 :

1- الإفصاح بدقة عن المشاعر

صارحي الزوج بإنك محتاجة تتناقشين معاه في موضوع معيّن يعنيك .. مثلاً : صارحيه بإنك تبغين

شوية إهتمام عاطفي / أو رغبة في الجنس لمدة أطول / .. خلك صريحة و دايركت معاه ..

و لا تدورين و تلفين .. لأن الصراحة في مثل هالمواضيع مثلاً مطلوبة جداً ..

عبري عن مشاعرك بصراحة " أنا خايفة " ,, " أنا أغار ... " ,, " أنا محتاجة ... " ,, " ودي أقعد

معاك وقت أطول هالأسبوع " ... الخ .. لأن التعبير عن المشاعر بيخليك صادقة مع نفسك أولاً ..

و بترتاحين ..

لا تكبتين مشاعرك لأنه خطأ .. و تدرين ليش خطأ ؟ لأن العواقب

مكلفة .. الكبت ما راح يحل مشكلة و لا راح يوصل للطرف الثاني اللي أنتي تبينه .. و اللي تبينه

- و هنا أقصد المشاعر - ما راح يستوي من تلقاء نفسه ..

و عشان تصارحين باللي في نفسك و تفصحين عنه و بدقة .. لازم تتكلمين بتأدب و لطافة ..

و حاسبي لا تكون في صراحتك تجريح للزوج .. قولي رايك بلطف و شوي شوي .. [

- الإستماع بإنصات للطرف الثاني :

المقصود هنا ( افهمي و تفهمي زوجك ) و ذكرنا إنه عشان تفهمينه لازم تسمعين له ..

كلنا نعرف نسمع .. لكن مب الكل يعرف يستمع .. لأن الإستماع فن .. و في فرق بين تسمعين و

تستمعين ..

قلنا إن الإستماع فن .. و هو سهل .. اسمعي زبن و افهمي و بعدين قولي رايك ..

القاعدة تقول : إفهم قبل أن تًفهَم ..

في دراسات تأكد إن أغلب المشاكل الزوجية سببها تافه .. هو سوء الإتصال ..

و تأكدي عزيزتي إن الإستماع صفة الناجحات .. و إن الله عطاك أذنين و لسان واحد ..

فاستمعي ضعف ما تتكلمين ..

3- تقبل الرأي الآخر :

إحنا كمجتمعات شرقية .. ما تعلمنا أو أقدر أقول ما نعترف بهالنقطة .. و أكيد أنتوا معي ..

و متبعين قاعدة ( كل شخص يخالفني الراي .. يعني هو عدو و خصم لي ) و هذا غلط ..

لأن يمكن اللي يخالفني شخص أحبه كثير..

و القرآن الكريم ذكر خلافات زوجات النبي عليه الصلاة و السلام .. لكن ما تغير شي من حبهم له

و لا حبه لهم رضوان الله عليهم جميعاً ..

خلي صدرك وسيع .. و تقبلي راي زوجك خاصة إذا صارحك بمشاعره ..

اشلون بتتصرفين لو جا مثلاً و قال لك : ( أنا عندي مشكلة في الفراش ) .. أو ( عندي رغبة في

الزواج ) أو أي شي ممكن ما تتقبلينه ..

تعودنا كحريم .. نستقبل مثل هالأمور بالصراخ و العويل .. الشي اللي يخلي الزوج يكتم على كل

شي و مايتكلم .. و الكتمان قنبلة موقوتة ..

الصراحة .. يقول لك عن اللي يكرهه أحسن من إنه يكتمه .. خليه يفكر معاك بصوت عالي ..

خليه يتكلم .. اعرفي مشاعره .. اعرفي أسبابه و النتايج اللي يبي يوصل لها .. و بعدين

ناقشيه بالبدائل ..

وانتبهوا يا أخواتي .. لو وحدة زوجها صارحها بشي في نفسه .. تروح تقول للغير .. خلي كل

حاجة بينكم سر .. و لا تعايرينه باللي قاله لك .. بالعكس شجعيه و خليه يتكلم و يعبّر ..

*
*
في نقطة مهمة .. أبيكم تعرفونها يا أخواتي .. خاصة بالحوار ..

و هي المفاهيم السابقة اللي شايلها كل طرف عن الزواج

و معتقداته ..

يعني أنتي جاية من بيئة و عندجك خلفية معينة عن الزواج .. زوجك كذلك .. جاي و عنده معتقدات

عن الزواج .. ( أنصحكم بقراءة كتاب : الرجال من المريخ و النساء من الزهرة ) مفيد جداً في

هالخصوص ..

الإنسان بطبيعته تركيبة معقدة جداُ .. كل شي عندنا نقوله و نسويه و نفكر فيه ما طرى علينا الا

و له علاقة بتجارب سابقة ..

مثال :

زوجين يشوفون إن الحب مهم في الحياة الزوجية .. لكن كل واحد فيهم له مفهوم مختلف

كلياً عن الحب ..

الزوج يشوف إن الحب حماية و رعاية للزوجة ..

الزوجة تشوف إنه عطاء و تضحية ..

الزوج يشوف إن زوجته تحبه لما تستمع له ..

الزوجة و الله تشوف إن زوجها يحبها لما يقعد معاها وقت أطول ..

و هكذا .. و هالمثال موجود بين الأزواج ..

لذلك .. عليك تفهمين و تعرفين مفاهيم الزوج الخاصة تجاه المشاعر المهمة بالنسبة لك ..

اقعدوا و خلوها جلسة نقاشية ( بعد ما تستأذنينه في هالشي أكيد ) .. و النقاش يدور حول موضوع

معين.. ( الحب .. الأسرة .. العلاقات الإجتماعية .. الإلتزامات المالية ... الخ ) ..

الجلسات هاذي بتكون عبارة عن أسئلة توجهينها له .. و تتناقشون فيها مع الأخذ بالإعتبار

الشروط الثلاث اللي ذكرناها ..

سادس طريقة :: أظهري إهتماماً بجسده و مظهره ::



من المتعارف عليه بينّا كإناث .. إن نلقى من المديح و المجاملات أضعاف مضاعفة .. يعني لو سألتك

عزيزتي .. متى آخر مرة سمعتي فيها مدح لك؟ اللي بتقول اليوم .. أو من شوي .. أو بالكثير

أمس ..

لكن لو سألت أخوي او أي رجل آخر .. لا تستغربين لو قال لك ( و لا مرة ! ) أو .. أذكر إنه الشهر

اللي فات اختي امدحتني أو قالت لي شي ..

لأن الحاجة هاذي متعارف عليها و إحنا نشوفها طبيعية ..

الدراسات وش تقول ؟ تقول إن الأولاد يقضون نفس الوقت اللي تقضيه البنت قدام المرايا .. بس وشو

اللي يصير ؟ إن البنت تلقى المديح أكثر .. او يمكن هو ما يلقى على كشخته و مظهره أي كلام

أو تعليق !!

بس على فكرة يا جماعة ترى الرجّال يحتاج لمن يمدح جسمه و مظهره بالضبط مثل ما تحتاجينه

أنتي ..

يعني انتي لو كنتي كاشخة و مظرك وااو و رايحة حفلة .. إذا ما لقيتي المديح من زوجك .. راح

تلقينه من أي حد موجود في الحفلة .. صديقاتك .. صديقة أمك .. اي أحد ..

لكن الزوج إذا ما لقى الإهتمام و الثناء من البيت .. نادر لما يلقاه برى البيت ..

مسكين الرجّال .. صح ؟

يعني تخيلوا خواتي .. يمشي الرجّال و ملبسه مكلفه غالي .. الغترة مكوية ..

الثوب من أروع ما يكون خامته ممتازة .. و تفصيله مرتب .. و العطر من كثر تركيزه تشمينه من

بعد أميال .. غير النعال الله يعزكم تلق ما هي جديدة .. يعني يسرف و يبذر في الأخير ما

يحصل كلمة و لا ثناء حلو .. حرام ( حنوا على أزواجكم يا متزوجات )

امدحي فيه كل شي .. كشخته .. ثوبه .. غترته .. بسمته .. ضحكته .. ريحته .. وقفته .. مشيته ..

رجوله .. ايديه ... الخ ..

لا تنتظرين لحد ما تسمعين التعليق من غيرك .. انتي ابتدي .. و قولي اللي عندك بكل صدق ..

بس انتبهي : لا تمدحينه مرة وحدة انتهزي الفرص ..
سابع طريقة :: اكتشفي السر العظيم و المخبأ عن الرجل ::

الموضوع في سر ؟؟ و عظيم بعد ؟؟

يعني في حاجة ما عرفتها لحد الحين ؟؟

و أسئلة كثيرة .. ممكن أي وحدة تسأل روحها .. بعد ما تقرا العنوان ..

*
*

تطمنوا عزيزاتي .. ما في سر بمعنى سر ,, أقصد هالسر كلنا نعرفه أو عرفناه ..

و هو :: إن في داخل كل رجل - مهما كان قوي و ناجح ... - طفل صغير , يحب يحس بالمودة

و المحبة اللي يخلونه متميز و خاص ..

و على فكرة الزوج ما راح يقول عن نفسه أنا مثل الطفل أحتاج كذا و كذا .. فكوني ذكية ..

و خلي هالسر بيني و بينك

الرجل يحب يعرف إنه بالنسبة لك .. أهم من أي شي .. أهم من والديك و اعيالك و اخوانك و خواتك .. و أهم من كل هالدنيا ..

وشلون بيعرف إنه مهم عندك .. تلقينه يسأل :: قولي لي يا .... ليش أنا متميز ؟ و ليش أنا مهم في حياتجك.. لا
تقولين لي مرة قولي لي كل يوم ::

بيكون هنن مثل الطفل اللي بيجي و بيقول :: ماما انتي تحبيني ؟ طيب وش كثر ؟ :: و يكرر هالسؤال يومياً ..

هذا الطفل .. لكن الزوج الطفل .. يبي إنك تقولين له و تحسسينه بهذا كله .. من غير ما يكرر السؤال ..

اعتبريه طفل من أطفالك .. و دلليه و دلعيه أكثر منهم

لما يسألك زوجك هالسؤال مو عشان انك مقصره معه لا بالعكس هو يسأل
بس زيادة معرفة و دلع هههه ..

في طريقة للتدليل سهلة و بسيطة و في نفس الوقت مؤثرة ::

هالطريقة تتلخص في ايش ؟ في إنك تنادينه بأسماء غير اسمه .. بس بشرط يكون هالأسم مناسب لصفة يحبها أو موجودة فيه ..

مثلاً :: إذا كان زوجك رومانسي ناديه بـ( روميو حياتي ) = لأنه رومانسي ..

و هكذا ..

ثامنا طريقة: احبي قربتة

صحيح إنه مو شرط على الزوجة إنها تخدم ام الزوج و ابوه و أولاده ( إذا كان

متزوج قبل ) أو أي أحد من أهله شرعا لكن يجب عليها حسن المعاملة والزوج

مو مجبور إنه يعيش حياته مع هالنوعية من الزوجات .. (التي لا تحسن معاملة أهله)

اي زوجة تقدر تقول " انا احب زوجي و اعشقه و أخدمه وتحطه في عينها " لكن في الواقع

القول هذا ما تترجم لأفعال .. طيب وشلون تترجمين ذاك الحب ؟

بكل بساطة أقول : عشانه .. حبي اهله

لأن هذا هو الإختبار الحقيقي .. و قديماً قال الغزالي : ( المؤمن إذا أحب المؤمن أحب كلبه ) ..

يعني لو كنتي تحبين زوجك فعلاً .. بتحبين كل حاجة تخصه كــــــــــل حاجة .. وشلون لو كانت

الحاجة هاذي هي أهله ؟! ..

و نصيحة لكم ياأخواتي :: مهما صار بينكم من سوء تفاهم ( بينك و بين زوجك ) او ( بينك و بين والدته )

و هذا اللي يحدث دائماً ..

انتبهي تخيرينه بينك و بين أمه

لأنه لو كان رجل يحترم إنسانيته بيختار أمه , ليش ؟ لأن مثل ما نعرف و جا في الحديث إن الأم

هي الأحق بالصحبة , يعني حتى من زوجته .. لأن الزوجة ذكرت في القرآن على إنها الصاحبة

كما في قوله تعالى : [ و صاحبته و بنيه ] ..

لا تحطينه في هالخيار .. لأنه الخيار بالنسبة له صعب و صعب جداً ..

الرجل الشرقي وش يحب؟؟ .. و شو الطريق لقلبه؟؟ ( غير معدته طبعاً ) الطريق سهل : حبي أمه

و أبوه و اعياله ( إن وجدوا ) ..

و انتبهي عزيزتي تذمين أمه أو ولده

أو أبوه أو أهله .. عايلته .. قبيلته .. جنسيته ( إذا كانت غير ) .. سوي العكس .. امدحيهم و حبيهم

أو حاولي تحبينهم عشان زوجك ..

يعني وش بيصير يا أختي و يا حبيبتي الزوجة ( و الكلام موجه للي عندهم مشاكل مع أم الزوج أو أهله عموماً )

لو كسبتي هالأم و حبيتيها و عطفتي عليها .. لا تنسين إنها مرة كبيرة محتاجة لإهتمام و حب

و عطف .. لأن لكل إنسان حاجة و هاذي حاجتها .. لا تلومينها .. لأن ولدها ( زوجك ) إنشغل بحياته

و أسرته .. ! عطيها اللي تحتاجه .. و في المقابل انتظري جزاء عملك .. هي بتتغير و بتصير

أحسن معاكِ و زوجك بعد بيصير أحسن و بيحترمك أكثر ..

طبعاً الكلام سهل أنا أدري ., لكن بعد التنفيذ مو صعب ( حاولي بس ) ..

و اللي ما تقدر تحب أهل الزوج .. الأحسن لها تشوف رجّال يتيم ما عنده قرابة و لا أهل ..

الطريقة التاسعة :: تجنبي الشكوك ::

في شكوك و في غيرة / الغيرة مقبولة و مرغوبة أحيانأ و انا اقصد الغيرة المعقولة .. أما

الشكوك فهي مرض ونار تغلي في قلب الشكاك .. و نار تكبر تبدا بالسؤال الواحد .. بعد هالسؤال

تظهر لنا أسئلة كثيرة ما لها حد .. بعدين تتحول الأسئلة هاذي الى تنصت و مراقبة و تتبع و تفتيش

في الجيوب ... الخ ! عملية كبيرة و معقدة ما لنا بها ..

المرأة اللي تشك دايماً عايشة في قلق و توتر و معاناة و إكتئاب .. و ممكن تمرض بعد !! و يصيدها

مرض ذهاني و في هالحالة راح تحتاج إلى طبيب نفسي ..

عشان كذا .. إذا ما كنتي تشكين قولي الحمد لله لأن هذا أمر طيب .. و تجنبي الشك من البداية ..

و إذا ابتليتي بالشك و تعانين منه لازم و حتماً تتخلصين منه ..

و تفضلي الطرق اللي ممكن تساعدك للتخلص من الشكوك :


1- اقطعي الشك من أول وهلة .. و لما تكون السالفة فكرة بس اقطعيها ..

2- إذا لا سمح الله شكيتي لا تتحققين ,, لأن ورد في الحديث الشريف ( إذا شككتم فلا تحققوا )

يعني لا تسوين شي و إذا كنتي تراقبين زوجك أو تتنصتين عليه .. اطلبي العلاج على طووول ..

و لا تطولين في المسألة ..

3- إذا كانت عندك شكوك و في مواقف أكدت شكوك .. لا تحترقين بشكك .. روحي و صارحي زوجك و تأكدي ( إن الله لا
يهدي كيد الخائنين ) ..

4- إذا عشتي في بيت أهلك .. و بين أم كانت تشك أو أب شكاك .. و تعترضتي أنتي للشكوك , اعرضي نفسك على طبيب نفساني .

5- إذا لا سمح الله زوجك فقد الثقة فيك .. بسبب شكك و متابعتك له .. تقدرين تردين الثقة و تبنينها
جديد في فترة ست شهور تقريباًُ بس متى ؟ إذا قطعتي التحقق تماماً ..

6- تعلمي الجلسة الإسترخائية .. لأنها راح تعينك على التخلص من الشكوك و التوتر بشكل عام ..

7- إذا مانفع الحوار مع الزوج و لا فادتك الاستشارة النفسية ,, وقتها اعرضي نفسك على الطب النفسي ..

طيب خلنا نقول إن الزوج هو اللي يشك فيك .. وشلون بتقدرين تخلصينه من شكوكه ؟؟؟؟

(هالكلام للي زوجها شاك على الفاضي أو الشك صفة فيه و مبتلي فيها)

drawGradient()

انا اقول لك وشلون .. تابعيني

تفضلي :

1- إهتمي فيه أكثر ..

2- اكدي من الوقت للثاني إنه هو الوحيد اللي في قلبك .. و كل معاني الحب اللي في داخلك له ... الخ ..

3- حاولي تجرينه في الكلام .. و خليه يتكلم عن طفولته و ماضيه .. يمكن تكون في حوادث مترسبة
في نفسه .. و تخليه يشك في أي شي ..

4- تحاوري معاه في هالموضوع ( الشك ) و اوعديه إن الكلام بيدور بينك و بينه ..

5- علميه على طول وين تكونين .. رحتي مشوار .. طلعتي مع اختك مع صديقتك علميه على طول بمكان تواجدجك.. بهالشكل أنتي بتساعدينه يتغلب على شكوكه + لا تنسين تستأذنينه في أعمالك و خروجك .. بالعربي حطيه في الصورة ..

6- لا تسمحين له يتمادى في التحقق من شكه و متابعتك .. و أكدي له إنك مستحيل تسوين أي شي هو يشك فيه .. بعد ما تسمحين له يتعرض لكرامتك أو يشكك فيك .

7- إذا استمر في شكوكه و لا شي نفع وياه .. تعالي له في لحظة هدوء و استرخاء و اقترحي عليه إنه يطلب الاستشارة النفسية ..

" الله يهدي جميع الشكاكين من الازواج "

[أميـرة الإحساس]

يسلـمــــووووووووووووو
لاعـــدمنااااااااااااااك

[تيا]

الموضوع اكثر من رائع قرئتة اكثر من مرة حتى استوعب وطبق تسلمي على الطر ح والأسلوب الممتع والله يزرقك الجنة يارب

[بلسم القلوب]

تسلموووووووووو حبيباتي الله يجزيكم الخير
ونورتي الواحة الغالية تياااااااا

[ورود ملونه]

الله يعطيك العافيه وماقصرتي

[** أم حماده **]

ماشاء الله
ده كلام كبير قوى وخطير
تسلم ايديكى بلسومه على النقل الرائع
ان شاء الله هارجع للموضوع الصبح مع فنجان شاى

[مسالمة]

هذاكلام مو بس مع الزوج حتى مع الاخرين لكي يعتاد اللسان
على مثل هذه الاخلاق الرفيعه
واكيد اول واحد هو الزوج
بارك الله فيك وجزاك الله خير
كم هذه المحاضر أصلحت بين الازواج بس لو نطبقها

[بلسم القلوب]

حياكم الله حبيباتي
واتمني لكم الفائدة